“Yoshlar daftari — imkoniyatlar daftari”

Kim uchundir ishsizlik bahona, bekorchilikdan bahra olib, tavsiya etilgan ish o‘rinlarining maoshi kam, ishi og‘ir, yo‘li uzoqligini ro‘kach qilib, voz kechadi. “Ishlayman” degan esa bahona qidirmaydi, imkonsizlikdan-da, imkon topadi. Jarqo‘rg‘onlik Rahmonqul Rajapov ham ish izlab o‘tirmay, o‘zini tomorqasidagi bo‘y yerdan unumli foydalanishga urdi. Hozirgi kunda issiqxona qurib, oilaviy ishlab daromad topmoqda.
Rahmonqul mahalladagi yoshlar yetakchisi yordami bilan 33 million so‘mlik kredit olib, issiqxonasini kengaytirib, qulupnay yetishtirishni yo‘lga qo‘ygan. Mehnatdan qochmaydi, balki ekinlari gurkirab yashnayotganidan, hosilga kirayotganidan kuchga to‘ladi. Maqsadni katta olib, oldinga intiladi.
Hozirda oyiga 8-9 million so‘m daromat topayotgan qahramonimiz kelajakda issiqxonasini kengaytirib, boshqa turdagi mahsulotlarni yetishtirishni maqsad qilgan.