Bugungi kunda maktablar bilan birga oliy ta’lim muassasalari o‘rtasida samarali va tizimli hamkorlik aloqalari yo‘lga qo‘yilgan. Bu, albatta, ta’lim tizimida o‘ziga xos burilish deyish mumkin. Endigina padagogik bilimlarini amaliyotga joriy etayotgan talabalar tajribali o‘qituvchilar darslarida ishtirok etib, o‘zlari ham ayni jarayonlarga tayyorlanayotgan bo‘lishsa, yoshlarning oliy ta’limga qamrovini oshirish maqsadida o‘quvchilarning xorijiy tillarni o‘rganishiga ham alohida e’tibor qaratilayotir. Maktablarda bu boradagi holatga qiziqqan Surxondaryo viloyati hokimi Ulug‘bek Qosimov hududlarga tashrifi davomida Jarqo‘rg‘on tumanida bo‘lib, tumandagi 2-sonli kasb-hunar maktabida kasbga tayyorlash muassasalarida dual ta’lim tizimini yo‘lga qo‘yish masalalarini muhokama qildi. Biriktirilgan oliygohlar bilan hamkorlikda dual ta’lim tizimini samarali yo‘lga qo‘yish, ish beruvchilarning talablari asosida o‘rta bo‘g‘in kadrlarini tayyorlash, xorijiy tillarni o‘qitish sifatini oshirish vazifalari belgilab olindi.
Shuningdek, viloyat rahbari mazkur ta’lim maskanida yaratilgan sharoitlar, ta’lim jarayonlari hamda hududdagi issiqxonada mahsulot yetishtirishni ko‘zdan kechirdi. Favqulodda vaziyatlar sinflari o‘quvchilari o‘zlarining ko‘rgazmali chiqishlarini namoyish etdi. Shundan so‘ng, tumandagi “Yangi O‘zbekiston” massivida “Vorkaut” maydonchasi tashkil etish, “Maxsus oilaviy bolalar uyi” va “Nogironligi bo‘lgan bolalar uchun oilaviy bolalar uyi”ning qurilishi ko‘zdan kechirildi. Viloyat rahbari hududda tashkil etilgan Kunduzgi parvarishlash xizmati guruhida bolalar uchun yaratilgan sharoitlarni ko‘zdan kechirib, tarbiyalanuvchilar uchun kitoblar jamlanmalarini topshirdi.
