Nuroniylarimiz Samarqandda…

Yurtimizning har bir go‘shasi o‘ziga xos tarovatga va bir necha ming yillik tarixga ega. Ayni tarixdan so’zlab turgan tarixiy boyliklarimiz, qadimiy obidalarimiz bor. Biz esa shu zaminda yashab turib, fursati yetganda o‘sha go‘zalliklardan bahramand bo‘lib turishimiz lozim.
Shu bois Sariosiyo tuman hokimligi hamda “Nuroniy” jamg‘armasi Sariosiyo tuman bo‘limi tashabbusi bilan tumandagi bir guruh nuroniylar ayni fursatdan foydalandilar. Va respublikamizning diqqatga sazovor go‘shalariga sayohatga otlandilar. Xususan, Sariosiyo tuman hududdagi 50 nafar faxriy ko‘hna va qadimiy Samarqand shahrining diqqatga sazovor joylari, tarixiy obidalari, muqaddas qadamjo va zamonaviy inshootlari bo‘ylab sayohat qildilar.
– Joriy yilning noyabr oyi mamlakatimizda “Keksalar uchun sayohat oyligi” deb e’lon qilinishi yurtimizdagi barcha keksalarni birday xursand qildi, – deydi Niloba mahallasi faoli S.Shamsiyeva. – Samarqanddagi tarixiy obidalarga sayohat qilib, ko‘nglimiz tog‘dek ko‘tarildi. Bunday xayrli tadbirlarni tashkil qilganlardan benihoya minnatdormiz.