Namunali madaniyat markazi foydalanishga topshirildi

Jamiyatimizdagi yangilanish ruhini har bir yurtdoshimizga yetkazish, shu asosda aholi qalbi va ongida vatanparvarlik ruhini ko‘tarish, aholi, ayniqsa, olis hududlarda istiqomat qiladigan fuqarolarga madaniy dam olish xizmatlari ko‘rsatish darajasini oshirish, respublikaning barcha hududlarida teatr, sirk va boshqa turdagi ommaviy-madaniy va konsert-tomosha tadbirlari tizimli ravishda yo‘lga qo‘yilgan. Shu maqsadda har bir tumanda sahnali zal, kutubxona, kinozal va to‘garak xonalari bo‘lgan madaniyat markazi faoliyati yo‘lga qo‘yilishi belgilangan.
Mazkur topshiriq ijrosini ta’minlash maqsadida joriy yilda viloyat hokimligi mahalliy byudjet mablag‘lari hisobidan, qisqa muddatda tadbirkor “Javohir Asliddin xususiy korxonasi” tomonidan jami 133 million so‘mlik kapital ta’mirlash ishlari amalga oshirilib, “O‘zbekiston” mahallasida 400 o‘rinli 46-sonli Uzun madaniyat markazi tantanali ravishda foydalanishga topshirildi. San’atga oshufta ko’ngillarning xursandchiligi cheksiz. Endilikda ushbu markazda iqtidorlar kashf etiladi, aholi, keng jamoatchilik vakillari uchun ommaviy-madaniy va konsert dasturlari namoyish etib boriladi.