Hokim Albert Suyargulovni qabul qildi

Ma’lumki, O‘zbekiston va Rossiya davlatlari o‘rtasida barcha jabhalarda hamkorlik aloqalari yo‘lga qo‘yilgan. Xususan, Surxondaryo viloyati bilan ham qishloq xo‘jaligi, savdo-iqtisodiy sohalarda o‘ziga xos hamkorlik qilinayotir. Ayni ishlarni davom ettirish maqsadida Surxondaryo viloyati hokimi Ulug‘bek Qosimov vohamizga amaliy tashrif bilan kelgan Tatariston Respublikasi prokurori Albert Suyargulovni qabul qildi.
Uchrashuvda ikki davlat rahbarlarining sa’y-harakatlari bilan O‘zbekiston-Rossiya munosabatlari yuqori darajada rivojlanib borayotganligi, hududlararo hamkorlik aloqalari, jumladan, Surxondaryo viloyati va Tatariston Respublikasi o‘rtasida savdo-iqtisodiy, ilmiy-texnikaviy, madaniy va qishloq xo‘jaligi sohalari hamda boshqa yo‘nalishlarda hamkorlik yo‘lga qo‘yilganligi qayd etildi.
Bu borada Tatariston Respublikasi raisi Rustam Minnixanov bilan o‘zaro tashriflar davomida qator kelishuvlarga erishilib, ular bugungi kunda hayotga tadbiq etilayotganligi bildirildi. Shuningdek, o‘zaro hamkorlik aloqalarini keng qamrovli rivojlantirish, yangi imkoniyatlarni ishga solgan holda istiqbolli loyihalarni amalga oshirish muhimligi ta’kidlandi.