Maktab roʻparasidagi uy. Ota endi tili chiqqan bolasiga soʻz oʻrgatardi:
— Bitta soʻk bolam, oyingni bitta soʻkkin…
Oradan ancha yil oʻtdi. Maktab roʻparasidagi oʻsha uyda ota oʻgʻliga tanbeh berardi:
— Ahmoq, onani ham soʻkib boʻladimi…
“Kechirilmas” ayb
U ishdan boʻshatildi. Chunki uning aybi koʻp edi. Kechirib boʻlmasdi aybini. Ishxonadagi hamma guvoh edi uning aybiga. Oqlab boʻlmasdi gunohini. Shu sababli ham xodimlar qistovi bilan boʻshatildi.Uning yagona aybi — nohaqlikka chidolmasdi, haqiqat tarafdori edi u. Nachora…Ishdan boʻshatildi u. Hali yana qancha ishdan boʻshatilishi kerak…
Mening hayotim
Ona oʻgʻlining telefonidan turmush oʻrtogʻiga qoʻngʻiroq qilmoqchi boʻldi va telefon kontaktlarini titkilay ketdi: Dilfuzaxon, Nilufarxon va Mohira ismlarini koʻrib oʻgʻlidan biroz ranjidi. Mening hayotim nomli kontaktga koʻzi tushib, kim ekan oʻsha oʻgʻlimni hayotiga aylanib ulgurgan oyimcha dedi-yu qoʻngʻiroq tugmasini bosdi va choʻntagiga qoʻl solib jiringlayotgan telefonini oldi va yigʻlab yubordi…
