Bir yaxshilik, o‘n bo‘lib qaytadi

Ayol jamiyatning gultojidir. Ular qo‘llab-quvvatlansa, g‘amxo‘rlik ko‘rsatilsa, bu yaxshilik jamiyatga bir necha baravar bo‘lib qaytishini amaldagi islohotlar ko‘rsatib, isbotlab turibdi. Kechagi ishsiz ayollar, kerakli qo‘llovdan so‘ng, ishbilarmon tadbirkor sifatida nafaqat o‘zi, balki atrofdagi ishsiz ayollarning-da ishli bo‘lishiga xizmat qilayotir.
Sherobod tumanidagi “Qorabog‘” mahallasida “Kambag‘allikdan — farovonlik sari” dasturi esa bu borada dasturil amal bo‘lmoqda. Dastur doirasida “Inson” ijtimoiy xizmatlar markazi, Sherobod kasb-hunarga o‘qitish markazi hamda Xotin-qizlar tadbirkorlik markazi tomonidan “Qorabog‘” mahallasida kambag‘al oilalar, nogironligi bo‘lgan fuqarolar, ijtimoiy yagona reyestriga turgan oilalar ro‘yxati shakllantirilib, tikuvchilik, kompyuter savodxonligi, ayollar sartaroshligi yo‘nalishlarida kasb-hunarga yo‘naltirildi.