Ilg‘or tajribalar joriy etiladi

Albatta, ta’lim va tibbiyot sohasida Koreya Respublikasi katta tajribaga ega. Ularning tajribasini o‘rganish, amaliyotda qo‘llash, o‘zimizda ham ushbu sohalarni rivojlantirishga xizmat qiladi. Davlatlarimiz o‘rtasida o‘rnatilgan hamkorlik aloqalari esa bu borada yaxshi samara bermoqda. Ayni aloqalarning davomi sifatida Surxondaryo viloyati hokimi Ulug‘bek Qosimov Oltinsoy tumanida Koreya Respublikasidan tashrif buyurgan “Sinsung” kompaniyasi direktori Jang Indeyok va “Beautiful People” uyushmasi vakili Jeyong Yong Juni qabul qildi.
Koreyaning “Beautiful People” uyushmasi va Sinsung kompaniyasi hamda Toshkent shahrida tashkil etilgan “Koreya markazi” MChJ qo‘shma korxonasi vakillaridan iborat delegatsiya Oltinsoy tumaniga tashrifi davomida sog‘liqni saqlash muassasalari, maktab va bog‘chalar faoliyati bilan tanishishgan.
Uchrashuv davomida tomonlar kelgusida sog‘liqni saqlash va ta’lim sohalari o‘zaro hamkorlini yo‘lga qo‘yish, tajriba almashish, ilg‘or tajribalarni joriy etish masalalarini muhokama qildi hamda kelgusida istiqbolli hamkorlik aloqalarini o‘rnatishdan manfaatdor ekanliklarini qayd etishdi.