Muzokoralar olib borilmoqda

Ta’lim sohasida tashlanayotgan qadamlar yoshlarni har tomonlama ilimli, saloyihatli va o‘z sohasining yetuk kadri sifatida tayyorlashga xizmat qiladi. Shu sababdan xalqaro standartlarga moslashish, ilg‘or tajribalarni amaliyotga joriy etish ishlari jadallik bilan amalga oshirilmoqda.
Ayni ishlarning davomi sifatida shu kunlarda poytaxtimizda O‘zbekiston-Italiya ta’lim forumi o‘tkazilmoqda. Ushbu forumda Termiz davlat universiteti rektori ham ishtirok etib, Italiyaning bir nechta nufuzli oliygohlari rahbariyati bilan muzokaralar olib bormoqda.
Toshkent shahridagi Turin politexnika universitetida Oliy ta’lim, fan va innovatsiyalar vaziri Qo‘ng‘irotboy Sharipov va Italiya Universitetlar va tadqiqotlar vaziri Anna Maria Bernini boshchiligida o‘tkazilayotgan forum ishida Italiyaning Universitetlar va tadqiqotlar vazirligi hamda uning huzuridagi 25 ga yaqin oliy ta’lim muassasasi, shuningdek, mamlakatimizning 40 dan ortiq yetakchi oliygohlari rektorlari ishtirok etmoqda.