Olis O‘shor qishlog‘ida ko‘chma kutubxona tashkil etildi

Kitob yosh-u keksaning doimiy hamrohi bo‘lar ekan, ma’naviyatimiz yuksalib, hech qanday tashqi ta’sirlar, ommaviy madaniyat-u kuchlar bizga daxl qila olmaydi. Sababi, bilimimiz, alq-u salohiyatimiz, ma’naviyatimiz eng kuchli quroldir. Shunday ekan, kitob o‘qishni, kutubxonalarda vaqt o‘tkazishni kanda qilmasligimiz kerak. Mutolaa majburiyat emas, sevimli jarayonga aylanishi lozim.
Denov tumanining viloyat markazidan qariyb 200 kilometr uzoqlikda joylashgan tog‘li O‘shor qishlog‘i aholisiga kutubxona xizmatini ko‘rsatish maqsadida 97-umumta’lim maktabida ko‘chma kutubxona tashkil etildi. Tuman axborot-kutubxona markazi hamda 97-umumta’lim maktabi hamkorligida tashkil etilgan ko‘chma kutubxonaga eng sara o‘zbek, jahon va bolalar adabiyotlari yetkazib berildi. Kitobxonlarning talab va istaklariga ko‘ra adabiyotlar har oy yangilanib, soni ham oshirib boriladigan bo‘ldi.
O‘quvchilar hamda o‘shorliklarning quvonchi cheksiz. Ushbu kutubxona ularning sevimli maskaniga aylanishiga esa shubha yo‘q.