Himoya orderi onlayn rasmiylashtiriladi

Himoya orderi xotin-qizlar va yoshlarni tazyiqdan himoya qilishning eng yaxshi yo‘liga aylandi. To‘g‘ri-da, zo‘ravonligi uchun jazolanib yoki katta miqdorda jarima to‘lagan inson qayta va qayta kimnidir hayotiga, tinchligiga xavf solarmikan? Agar shunday qolsa, keyingi hayotini panjara ortida tasavvur qilaveradi-da.
To‘g‘ri, himoya orderi haqida eshitgan, ammo uni qanday olishni bilmaydigan fuqarolar ham ko‘plab uchraydi. Ana shunday insonlarning sarson-sargardon bo‘lishlarining oldini olish maqsadida endilikda himoya orderi onlayn tarzda rasmiylashtiriladi. Hukumatning joriy yil 26-avgustdagi 529-son qarori bilan xotin-qizlarga himoya orderini berish tartibi takomillashtirilmoqda.
Hujjat bilan tazyiq va zo‘ravonlikka uchragan xotin-qizlarga YAIDXP orqali himoya orderi berish, orderni elektron shaklda berish, himoya orderini berish jarayonini avtomatlashtirish, profilaktika inspektori tomonidan himoya orderini tashabbus tartibida berish kabi jihatlar nazarda tutilyapti. Belgilanishicha, himoya orderi profilaktika inspektori tomonidan tazyiq, zo‘ravonlik holati yoki ularning yuzaga kelish xavfi aniqlangan paytdan e’tiboran 24 soat ichida beriladi.
YAIDXP orqali himoya orderini rasmiylashtirish va berish to‘lovlarsiz amalga oshiriladi. Shuningdek, 1-dekabrdan boshlab tazyiq va zo‘ravonlik holatlari aniqlanganda, bir kalendar yil davomida ikki va undan ortiq marotaba himoya orderi profilaktika inspektori tomonidan uning tashabbusi bilan beriladi.