Rimda xalqaro turnir o‘z nihoyasiga yetdi

Kurash o‘zbekning milliy o‘yini. Unda alplar mardi-maydon bo‘lib, bilagi zo‘rlar g‘olib bo‘lgan. Bugun dunyo alplari kurash tushmoqda, bugun dunyo ahli kurashni biladi. Maydonga tushgan mardlarni kuzata turib, qay tilde so‘zlamasin, o‘zbekona lutf bilan “halol”, “chala”, “yonbosh” deya hayqiradi. Rimda Yevropa va Osiyodan tashrif buyurgan 18 davlatdan 50 nafardan ortiq kurashchi ishtirok etgan xalqaro turnirda o‘z kuchlarini sinab ko‘rdilar.
Qizg‘in kechgan bellashuvlarda eng go‘zal usul va betakror uslublar namoyish etildi. Ushbu nufuzli turnir IKA reyting tizimiga kiritilgan bo‘lib, g‘olib va ikkinchi o‘rin egalari World Series Pro turniri uchun qimmatli reyting ochkolarini qo‘lga kiritadilar. Erkaklar o‘rtasidagi final bahsida sariosiyolik Muhsin Hisomiddinov ruminiyalik raqibi Natea ILIE-DANIELni 3 ochko farqi bilan yengib, oltin medalni qo‘lga kiritdi.