Tozalik posbonlari velosipedli bo‘ldi

Shahrimizning toza-ozoda, fayzli ko‘rinish kasb etishiga tinim bilmayotgan tozalik posbonlarining xizmati nihoyatda katta. Kimdir bunga e’tibor berar, kimlardir yo‘q. Ammo erta tongdan chumolidek g‘imirlab, issiqni issiq, sovuqni sovuq demay supur-sidir, chiqindilarni yig‘ishtirish ishlari ila band ekaniga har birimiz guvoh bo‘lganmiz. Ana shunday fidoyi insonlarni munosib rag‘batlantirish maqsadida O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimovning tegishli buyrug‘iga binoan Surxondaryo viloyatida Obodonlashtirish va sanitar tozalash sohasida xizmat qilayotgan bir guruh xodimlariga velosiped topshirish marosimi bo‘lib o‘tdi.
Tadbirda viloyat Ekologiya boshqarmasi boshlig‘i Bahodir Urunov so‘zga chiqib, soha xodimlarini avvalo bayram bilan tabriklab, kelgusi ishlariga mufaqqiyatlar tiladi. Viloyatimizda olib borilayotgan tozalik va obodonlashtirish ishlariga o‘z hissasini qo‘shayotgan sohaning bir guruh xodimlariga faxriy yorliq va qimmatbaho velosiped sovg‘asi topshirildi.