Chiqindi uyumi bartaraf etildi

Qizim shirinligini yedi-yu, chiqindisini mashina oynasidan tashlamoqchi bo‘ldi. Darrov uni to‘xtatib, bu ishi yaxshi emasligini aytganimda, endigina ikkinchi sinfga o‘tgan o‘g‘lim ham nasihatni davom ettirgan bo‘ldi. Shu tariqa, yana bitta bola chiqindini duch kelgan yerga tashlamaslikni bilib oldi. Qaniydi, hamma ana shunday tushunsa, kattalar ham bu borada e’tiborliroq bo‘lib, besh yoshli bola kabi ish tutishmasa…
Aks holda Termiz shahrining “Bog‘zor’” mahallasida noqonuniy chiqindi uyumi yuzaga kelmagan, aholi murojaatiga sabab bo‘lmagan bo‘lardi. yaxshiyamki, sanitar tozalash korxonasi “Bio texno-eko “MChJ xodimlari tomonidan chiqindi uyumi o‘z vaqtida tozalab olindi. Shundan keyin belgilanmagan joyga maishiy chiqindilarni tashlashiga yo‘l qo‘ymaslik uchun Termiz shahar Ekologiya bo‘limi xodimlari tomonidan tezkor reyd tadbirlari muntazam yo‘lga qo‘yildi.