Sportchi yoshlarimiz erishayotgan yutuq va muvaffaqiyatlar har bir yurtdoshimizni g‘ururlantirishi bor gap. Albatta, bunda qilingan harakatlar, mehnat o‘z mevasini ko‘rsatayotganidan dalolat. Sportchilarimiz zabt etgan pog‘onalarda to‘xtab qolmasdan, balki yanada oldinga intilayotir.
Vetnamning Danang shahrida para taekvondo bo‘yicha o‘tkazilgan Osiyo ochiq chempionatida Guljanoy Naimova ham ishtirok etib, muvaffaqiyat qozondi. Musobaqaning +65 kilogramm vazn toifasida mamlakatimiz sharafini himoya qilgan Guljanoy barcha raqiblarini mag‘lub etib, shohsupaning eng yuqori pog‘onasidan joy oldi hamda o‘z hisobidagi oltin medallar sonini yana bittaga ko‘paytirdi.
