Yoshlarning qiziqishini oshirdi

Ishlayman, bir kasbning boshini tutaman degan yoshga munosib shart-sharoit yaratish shart va zarur. Bu borada hududlarda tashkil qilingan kasb-hunar o‘rgatuvchi maktablar faoliyati muhim ahamiyat kasb etmoqda. Ushbu maktablarda o‘tkazilayotgan “Ochiq eshiklar kuni” tadbirlari esa bitiruvchi o‘quvchilarning kasb-hunar o‘rganishga bo‘lgan ishtiyoqini oshirib, kelajak yo‘nalishini tanlashida ham imkoniyatlar eshigini ochayotir.
Boysun tumanidagi 2-son kasb-hunar maktabida “Ochiq eshiklar” festivali bo‘lib o‘tdi. Unda tumandagi 59 ta umumta’lim maktabi hamda 1 ta ixtisoslashtirilgan maktabidagi jami 2262 nafar 9-sinf bitiruvchi yosh ishtirok etdi. Festival doirasida kasb-hunar maktabida mavjud 4 ta yo‘nalish haqida batafsil ma’lumot berildi. Jumladan, Raqamli axborotlarni qayta ishlash, tikuvchilik, avtomobil dvigatellarini tashxislash va ta’mirlash, avtomobil shassisiga texnik xizmat ko‘rsatish yo‘nalishi bo‘yicha o‘quvchilarning amaliy mashg‘ulotlari ham namoyish etildi.
Kasb-hunar maktabi tomonidan tashkil etilgan ko‘rgazmalar, amaliy darslar, badiiy chiqishlar, sport va zakovat o‘yinlari ishtirokchilarda katta taassurotlar qoldirdi va taklif etilgan kurslarga nisbatan qiziqishlarini oshirdi.