33 nafar ayol g‘olib

Ayol jamiyatda erkaklar bilan teng huquqqa ega. Shunga qaramay, u hayotda o‘z o‘rnini topishda qiyinchilikka uchrashi ham bor gap. To‘g‘ri, bu hukm barcha ayollarga tegishli emas, ammo qo‘limda hunarim yo‘q, hasb-u korim yo‘q deya, uyda qolib ketayotganlar ham, o‘zining iste’dodi va iqtidorini namoyon etishga iymanadiganlar ham, tazyiqqa va zo‘ravonlikka uchrayotganlar ham afsuski topiladi. Ana shunday jihatlarni inobatga olgan holda AKTEDning Fransiya taraqqiyot agentligi O‘zbekistondagi filiali hamkorligida Angor, Sherobod, Muzrabot tumanlarida maqsadli 30 ta mahallada bajarilayotgan “Markaziy Osiyo/O‘zbekistonda zo‘ravonlik xavfi ostida bo‘lgan va zo‘ravonlikka uchragan ayollarni qo‘llab-quvvatlashda fuqarolik jamiyati salohiyatini kuchaytirish” loyihasi doirasida reintegratsiya dasturida o‘qitilgan ayollar o‘rtasida “Biznes rejalar” grant tanlovi o‘tkazildi.
Ushbu tanlovda 33 nafar ayol g‘oliblikni qo‘lga kiritib, ichidagi qo‘rquv va ikkilanishni yengib o‘ta olishdi. Endi ular jamiyatda o‘z o‘rinlarini topib, ayollar nimalarga qodir ekanini ko‘rsatib, atrofdagilarni ham o‘zlariga ergashtira olishadi. Ayollarni tadbirkorlikka jalb qilish, bandligini ta’minlashga ko‘maklashishga chorvachilik, parrandachilik, tikuvchilik, qandalotchilik, ayollar sartaroshligi, kompyuter xizmati ko‘rsatish yo‘nalishlarda grant mablag‘idan asbob-uskunalar, jihozlar, chorva mollari, parrandalar ayollarga yetkazib berildi.