Aholiga qulaylik yaratish maqsadida

Ijtimoiy himoya milliy agentligiga qarashli Farhod ayollar muruvvat uyida aholiga tibbiy yordam ko‘rsatish, bemorlarni davolash shakllari hamda metodlari takomillashtirilib, xizmat ko‘rsatish madaniyati va sifati oshirilmoqda. Jumladan, ichki a’zolar, yurak-qon tomir, asab va tayanch-harakat tizimlarida kasalliklar, nogironligi bo‘lgan shaxslarda reabilitatsiya qilishning individual dasturlariga muvofiq tibbiy, ijtimoiy-kasbiy, ijtimoiy, psixologik yordam ko‘rsatish maqsadida zamonaviy reabilitatsiya xizmat ko‘rsatish bo‘limi ochildi. Bo‘limda ilg‘or tajribalar, zamonaviy texnologiyalardan foydalaniladi.
Shu paytgacha nogironlik va nogironlikka olib keluvchi xastaliklarni davolash, uning asoratlarini kamaytirishga ko‘proq e’tibor qaratib kelingan bo‘lsa, yangi reabilitatsiya bo‘limida nogironlikni keltirib chiqaruvchi sabab va omillarni ilmiy asosda o‘rganish, erta aniqlash choralari ko‘riladi. Bir so‘z bilan aytganda, yangi reabilitatsiya xizmat ko‘rsatish bo‘limi aholiga bepul xizmat ko‘rsatish bilan birga faoliyatini yangicha asosda yo‘lga qo‘yish uchun amaliy ishlar boshlab berdi va bu yaqin orada o‘zining ijobiy natijasini beradi.