Ovozi, qo‘shiqchilikda iste’dodi bor insonni to‘xtatib bo‘lmaydi. U kuylashdan, atrofdagilardan zavq ulashishdan charchamaydi. Bilaks, ularni to‘xtatmaslik, yanada ruhlantirib, o‘z iqtidor qirralarini yanada sayqallashi uchun munosib motivatsiya bermog‘imiz lozim. Boysun tumanida tashkil etilgan “Besh tashabbus olimpiadasi” doirasida “Yoshlar ovozi – 2024” ko‘rik-tanlovining tuman bosqichi ham iqtidor egalarini ruhlantira oldi.
Unda mahalla, sektor bosqichlarida g‘olib bo‘lgan 52 nafar yoshlar ishtirok etdi. Tanlov 3 yosh toifasida, to‘rtta yo‘nalish – opera, baxshichilik, an’anaviy ijro hamda estrada yo‘nalishi bo‘yicha bo‘lib o‘tdi. Mardi maydon bo‘lgan ishtirokchilarning san’atini tomosha qilishga kelganlar ham o‘tgan vaqtidan sira achinishmadi. Opera kuylayotgan yoshlarning ovoz imkoniyatlari sinovdan o‘tgan tanlovda yosh baxshilar ham bo‘sh kelishmadi. Aytimlari bilan tomoshabinlarni lol qoldirishdi. Shuningdek, an’anaviy va estrada yo‘nalishidagi ijro ham barchaga manzur bo‘ldi.
Tanlov g‘oliblari diplom hamda pul mukofotlari bilan taqdirlanib, 1-o‘rin g‘oliblariga viloyat bosqichiga ishtirok etish uchun yo‘llanmalar berildi.
