Surxondaryo delegatsiyasi Xitoyda

Xalqaro hamkorlik aloqalarining mustahkamlanishi yurtimizda barcha sohalarda istiqbolli rejalarning amaliyotga tatbiq etilishiga xizmat qiladi. Bunga ana shunday hamkorlik natijalari misolida ko‘rib, kuzatib turib amin bo‘lmoqdamiz. Navbatdagi hamkorlik aloqalari Xitoy Xalq Respublikasi bilan bo‘ldi. Surxondaryo viloyati hokimi Ulug‘bek Qosimov rahbarligidagi delegatsiya Xitoy Xalq Respublikasiga yetib bordi. Tashrifning birinchi kunida 9 ta kompaniya prezidentlari hamda vakillari bilan muzokaralar o‘tkazildi.
Muzokaralarda yer osti boyliklarini qazib olish va qayta ishlash, “City” qurish, sog‘liqni saqlash va muqobil energiya sohalarida hamkorlikni yo‘lga qo‘yish, davlat-xususiy sherikchilik asosida M-41 xalqaro magistral yo‘li hamda Amuzang-1 va Amuzang-2 kanallarini ta’mirlash, oqava suv tizimlarini yaxshilash, infratuzilma obyektlarini qurish loyihalarini amalga oshirish, Urumchi-Termiz savdo uyini tashkil etish, yangi yerlarni o‘zlashtirish, chigit urug‘chiligini rivojlantirish, metalni qayta ishlash hamda logistika markazini tashkil etish kabi loyihalar yuzasidan kelishuvga erishildi hamda shartnoma va memorandumlar imzolandi.
Shuningdek, Qoraqalpog‘iston Respublikasi Jo‘qorg‘i Kenges raisi, viloyatlar va Toshkent shahri hokimlarining Xitoy provinsiyalari gubernatorlari bilan uchrashuvi bo‘lib o‘tdi. Delegatsiyamizning Xitoyga tashrifi davom etmoqda.