G‘olib Buyuk Britaniyaga…

Yoshlarning xorjiy tillarni o‘rganishiga e’tibor kuchaygan bir paytda maktablarda ham o‘qituvchi-pedagoglardan talab va mas’uliyat ortgan. Maqsad bir ekan, birdamlik bilan tashlangan qadam marra tomon yaqinlashtiradi. O‘quvchilarning chet tillarini naqadar o‘zlashtirayotgani, bu borada maktablarning xizmati nechog‘lik ekanini aniqlash maqsadida Prezident sovrini uchun “Xorijiy tillarni o‘qitish bo‘yicha eng yaxshi maktab” tanlovi o‘tkazilayotir. O‘tgan o‘quv yilida bo‘lib o‘tgan tanlovning viloyat bosqichiga Termiz shahridagi 9-umumta’lim maktabining 5 nafar yuqori sinf o‘quvchilaridan tarkib topgan jamoa ishtirok etib, respublikaga yo‘llanmani qo‘lga kiritgan edi.
Aytish kerakki, g‘olib o‘quvchilarning har biri ingliz tili bo‘yicha yuqori natijalarga erishgan, yuksak marralarni ko‘zlagan yoshlardan. Ilm ortidan quvib, aslo kam bo‘lmagan bu yoshlar tanlovning shahar va viloyat bosqichlarida g‘oliblikni qo‘lga kiritib, jami 350 million so‘m pul mukofotiga ega bo‘lishdi. Bu mablag‘larning 25 foizi o‘quvchilarga, 25 foizi o‘qituvchilarga, qolgan 50 foizi maktab fondi uchun yo‘naltirildi. Respublika bosqichida faol ishtiroki uchun esa jamoa Buyuk Britaniyaga sayohat qilish imkoniyatiga ega bo‘ldi.