Nafsiga qul bo‘lib…

Mahallalarda hokim yordamchilari lavozimi joriy etildiyu, ular aholini kambag‘allikdan qutqaruvchi, mahallada ishbilarmonlik va tadbirkorlik muhitini yaratuvchi xaloskor sifatida qarala boshlandi. Sababi, ularning vakolat doirasi ancha keng bo‘lib, aholini munosib qo‘llab-quvvatlashi, tashabbus ko‘rsatishi uchun ma’lum mablag‘ ham ixtiyorlariga berildi. Bunday imkoniyatdan qaysidir hokim yordamchilari foydalanib, haqiqatda odamlar og‘irini yengil qilgan bo‘lsa, kimlardir bu imkondan nafsi yo‘lida foydalandi. Har ikki yo‘lning oxirida yo rag‘bat, yo jazo muqarrar. Shunchaki, har kim o‘z qilmishiga, qilgan ishiga qarab, o‘ziga tegishlisi bilan “siylanishi” esa haqiqat.
Surxondaryo viloyati Qumqo‘rg‘on tumani, «To‘da» MFY hokim yordamchisi lavozimida ishlovchi U.T. tadbirkorlik faoliyati bilan ham shug‘ullanib, 2022-yil 29-martda o‘zi ta’sischiligida tashkil etgan «VOLUNTEER TEAM» MCHJni 2023-yil 20-sentyabrga qadar boshqarib kelib, ta’minotchi sifatida fuqaro M.E. va boshqalarni aldab, ularning elektron imzolarini qo‘lga kiritib, ularning nomiga issiqxona faoliyati tashkil etish uchun 4 marotaba 33 million so‘mdan jami 132 million so‘m kredit ajratilishiga erishib, ushbu pullarni o‘zi rahbarlik qilayotgan jamiyat hisobiga tushirib, o‘zining ehtiyojlariga ishlatib yuborgan.
Holat yuzasidan Qumqo‘rg‘on tumani prokuraturasi tomonidan «VOLUNTEER TEAM» MCHJ rahbari U.T.ga nisbatan JKning 168-moddasi (firibgarlik) 3-qismi «b,v» bandlari bilan jinoyat ishi qo‘zg‘atilgan.Hozirda jinoyat ishi bo‘yicha dastlabki tergov harakatlari Qumqo‘rg‘on tumani IIB huzuridagi Tergov guruhi tomonidan olib borilmoqda. Tergov harakatlarining borishi viloyat prokuraturasi tomonidan nazoratga olingan.