Har tomonlama qulaylik

Muzrabot tumani Dehqon bozorida arzonlashtirilgan mahsulotlar yarmarkasi tashkil etilgan. Sotuvchilar marjondek terib qo‘yilgan meva va sabzavotlardan tortib, go‘sht va boshqa oziq-ovqat mahsulotlarini sotishga kirishgan. Xaridorlar ham bir-bir o‘zlariga kerakli mahsulotlarning narxini so‘ragan, xarid qilishga tutingan. Savdo rastalarida sotuvga qo‘yilgan mahsulotning narxi yozib qo‘yilgan.
Xalqimizda otang bozor, onang bozor degan gap bor, narx-navosi yozilgani bilan odamlarimiz savdolashishni, bir so‘mning ustida tortishishni xush ko‘rishadi. Oldi-sotdi jarayoni qizg‘in tus olgan yarmarkadan xaridorlarning boshi osmonda. Barokatli bozor-o‘char qilishayotganidan mamnun. Ayniqsa, ushbu arzonlashtirilgan savdo yarmarkasi faqat bayram kunlari emas, balki odatdagidek savdosi yo‘lga qo‘ygani aholiga har tomonlama qulaylik tug‘dirayotir.