Janubiy vohaning tuprog‘i zar, undan topganimiz esa oltinga teng. Shu jihatdan tomorqamizning har qarichidan unumli foydalanib, yilda to‘rt fasl ham hosil olib, mo‘may daromad ko‘rishimiz mumkin. Ana shunday daromad manbaidan foydalanmaslik, yerni ekin-tikinsiz qoldirish esa uvol. Surxondaryo viloyati hokimi Ulug‘bek Qosimov rahbarligida qishloq xo‘jaligi masalalari yuzasidan videoselektor tarzida bo‘lib o‘tgan yig‘ilishda ham ayni shu masalalar o‘rtaga tashlandi.
Yig‘ilishda Sariosiyo tumanidagi fermer xo‘jaliklariga va tomorqa yer egalariga ajratilgan maydonlardan samarali foydalanish, bog‘ yer maydonlarini tartibga keltirish, ekindan bo‘shagan yer maydonlarini shudgorlash, agrotexnik tadbirlarni o‘z vaqtida bajarish, fermer xo‘jaligi rahbarlariga reja asosida ishlarni tizimli tashkil etish bo‘yicha ko‘rsatmalar berildi.
Shuningdek, tuman hokimi uchrashuvda sohada belgilangan ishlarni amalga oshirish, ishlarni sifatli va muddatida bajarilish bo‘yicha mas’ullarga vazifa yukladi hamda paxta parvarishi bo‘yicha ishlarni tizimli olib borish bo‘yicha ko‘rsatmalar berdi.
