Maktab bitiruvchilarining oliy ta’limga o‘qishga kirishi nafaqat ular, balki davlatning kelajak taqdiri uchun ham muhimdir. Shu sababdan ham Bandixon tumanida maktablarda 2023-2024-o‘quv yilida ta’lim sifatini oshirish hamda 2022-2023-o‘quv yilida yo‘l qo‘yilgan kamchililarni bartaraf etish yuzasidan maktablar kesimida tahliliy-tanqidiy yig‘ilish bo‘lib o‘tdi.
Yig‘ilishda maktab o‘qituvchilarning toifa ko‘rsatkichi, 11-sinf bitiruvchilarning OTMga kirish ko‘rsatkichi hamda bandligini ta’minlash masalalari tanqidiy tahlil qilinganda tumandagi 24-, 38-umumiy o‘rta ta’lim maktabi bitiruvchilaridan birortasi OTMga kirmaganligi, 18-, 39- umumiy o‘rta ta’lim maktablarida oliy toifali o‘qituvchi yo‘qligi e’tirozlarga sabab bo‘ldi. Yig‘ilish so‘ngida OTMga birorta ham o‘quvchisi kirmagan 24-maktab direktori J. Zokirov va 38-maktab v.b direktori B. Eshovlarga nisbatan navbatdagi intizomiy jazo qo‘llanilgan bo‘lsa, 18-, 39-maktab direktorlariga ogohlantirish berildi.
