Birinchi bosqichi yakunlandi

Bozorlar o‘sha davlatning fuqarolari qanday yashayotganini bildirish bilan birga, ijtimoiy-siyosiy, iqtisodiy ahvoldan ham xabardor qiladi. To‘g‘ri-da, aholining ko‘ngildagidek va barokatli bozor-o‘char qilishi uchun bozorlarimizda barcha shart-sharoitlar yaratilgan bo‘lmog‘i lozim. Qiziriq tumani “Oqjar” mahallasida 3,3 gektar maydonda joylashgan “Istara dehqon bozori”ni qayta rekonstruksiya qilish bo‘yicha umumiy qiymati 6,1 milliard so‘m bo‘lgan loyiha amalga oshirilayotganidan xabardormiz. Ushbu loyihaning birinchi bosqichi foydalanishga topshirilib, tuman ahlining ko‘nglini xushnud ayladi.
Bozorning foydalanishga topshirilishiga bag‘ishlangan tadbirda viloyat hokimi Ulug‘bek Qosimov ham ishtirok etib, tuman mutasaddilari bilan bozor hududida sotuvchi va xaridorlar uchun yaratilgan sharoitlarni ko‘zdan kechirdi hamda oziq-ovqat mahsulotlarining narx-navosi bilan tanishdi.
Loyihaning keyingi bosqichlari qurilishini jadallashtirish, sifatli yakunlash, shuningdek, bozor hududida asosiy turdagi oziq-ovqat mahsulotlari narxlarining asossiz oshirilishining oldini olish, arzonlashtirilgan mahsulotlar savdo yarmarkalari tashkil etish bo‘yicha vazifalar belgilab berildi.