Ongida g‘ujg‘on urayotgan g‘oyalarini ro‘yobga chiqarish uchun tavakkal qilishga qo‘rqmaydigan, sarmoya tikib, daromad olishga intiladigan odamlarni tadbirkor deb ataymiz. O‘z o‘rnida ular o‘z ishi orqali atrofdagilarga o‘rnak va namuna bo‘lib, ishbilarmonlik muhitini yaratishga xizmat qiladi. Ana shunday tadbirli, ishida muvaffaqiyat qozongan ishbilarmon Termiz shahridagi “Geniy Termiz” MChJ rahbari Gennadiy Kravchenyadir.
Tadbirkorning faoliyati, albatta, keng jamoatchilik uchun qiziq. Shu sababdan Gennadiy Kravchenyaning tadbirkorlikka qiziquvchi yoshlar hamda aholi vakillari bilan uchrashuvi bo‘lib o‘tdi. Uchrashuvda Gennadiy Kravchenya tadbirkorlik faoliyati, erishgan yutuqlari, muvaffaqiyatlarining muhim omillari haqida ishtirokchilarga gapirib berdi. Yoshlar hamda aholi vakillarini qiziqtirgan savollarga batafsil javob qaytardi.
– Har qanday ishda muvaffaqiyatga erishishning asosiy omillari izlanish, sa’y-harakat, mashaqqatli mehnat, eng asosiysi, omilkorlik bilan ish yuritishda, – deydi tadbirkor G.Kravchenya.
Mazkur uchrashuv tadbirkorlikni endi boshlagan, tadbirkorlikka qiziqqan yoshlarning tadbirkorlik borasidagi bilim va tushunchalarini boyitishga, biznesga bo‘lgan qiziqishlarini oshirishga xizmat qilsa, ajab emas.
