Qumqo‘rg‘onda paxta yig‘im-terimi boshlandi

Sidqidildan qilingan mehnat, albatta, o‘zining shirin mevasini beradi. Ayni shunday bugun dalalarda bobo dehqon va fermerlarimizning mashaqqatli mehnati o‘z nishonasini berib, oppoq paxtalar qiyg‘os ochilgan. Qumqo‘rg‘onlik paxtakorlar ham paxta hosilini birinchilardan bo‘lib yig‘ib-terib olishga kirishgan.
Paxta dalalarida terimchilarga barcha shart-sharoitlar yaratilgan. Ular toza ichimlik suvi va etaklar bilan ta’minlangan bo‘lib, tushlikda esa issiq ovqat ham tayyor. Qolaversa, terimchilarning kayfiyatini ko‘tarib, mavsumni uyushqoqlik bilan boshlashlari uchun eng ko‘p paxta teradiganlar uchun sovg‘alar ham hozirlangan.
Tuman hokimi Anvar Normamatov N.Mirzayev hududidagi “Jasurbek Xushnudbek imkon” fermer xo‘jaligi dalasida bo‘lib, terimchilar bilan suhbatlashdi. Hosilni nest-nobut qilamasdan yig‘ib-terib olish borasida zaruriy ko‘rsatmalar berdi.