Faoliyati bilan ibrat

Sho‘rchilik Muazzam Pardayeva tayyorlayotgan shirinliklardan bir tatib ko‘rsangiz, faqat va faqat ayi shu shirinliklardan xarid qilishni odat qilasiz. Mohir pazanda hunari ortidan oilada ham, jamiyatda ham o‘rnini topgan ayollardan. Tadbirkor ayolning pishiriqlari mahallada dong‘i ketgan va xaridorgirligi bilan mashhur. Bu esa pishiriqlarga bo‘lgan talabni oshiradi.
O‘z-o‘zidan ayonki, talabning ortishi, qo‘shincha ish o‘rniga, yordam kuchiga ehtiyoj tug‘diradi. Shuning uchun Muazzam opa mahalladagi xotin-qizlarning 9 nafarini yoniga olib, ish bilan ta’minlagan. Erta tongdan ish boshlagan xotin-qizlar pishiriq pishirishni boshlashsa, kunni qanday kech qilishganini bilmay qolishadi. Ayniqsa, xaridorlarning maqtovlari ularning zavqini oshirib, charchoqlarini chiqargandek bo‘ladi.
Mana shunday tadbirkor ayollar nafaqat daromad olib, ish o‘rinlari yaratishayotir, balki jamiyatda xotin-qizlarning o‘rni, izlansa, harakat qilsa, hech kimdan kam emasligini ham ko‘rsatishda ibrat va namuna bo‘layotir.