Mahallalarda mikromarkazlar tashkil qilinadi

Mahallalarda mikromarkazlarning tashkil etilishi foydali va fuqarolar uchun manfaatli tashabbus bo‘ldi, deyish mumkin. Natijada, ayniqsa, xotin-qizlar tadbirkorlik bilan shug‘ullanib, o‘z faoliyatlarini boshlashmoqda. Albatta, bundan maqsad har bir ayol ishli bo‘lishi, hunar o‘rganib, ro‘zg‘orini uddalashidir. Mikromarkaz esa ana shunday xotin-qizlar va yoshlarni bir yerda jam etadi.
Sherobod tumani “Taroqli” mahallasida ham 10 ta yo‘nalishda hunarmandchilik mahsulotlari ishlab chiqaruvchi mikromarkaz tashkil etildi. Natijada 150 nafar xotin-qizning bandligini ta’minlandi. Hozirgi vaqtda esa 132 nafar ayol turli yo‘nalishlarda o‘qitilib, ish o‘rganib, shu bilan bir qatorda ishlay boshladi. Subsidiya asosida jihozlangan markazda yettita mahalladagi ishsiz, imkoniyati cheklangan xotin-qizlar jalb etilgan. Qolaversa, ishchi-xodimlar uchun barcha zaruriy shart-sharoitlar yaratilgan.
Markazda xotin-qizlar gilam to‘qish, pazandalik, tikuvchi, to‘quvchilik, sandiqchilik, sartaroshlik, sovundan gullar yasash sirlarini o‘rganish bilan birga ayni yo‘nalishlarda o‘z faoliyati yo‘lga qo‘yishadi.