Ba’zi iste’dodli yoshlar borki, yozgi ta’tilda ham tinim bilmaydi. O‘rganish, sevimli mashg‘ulotlari bilan band bo‘lishadi. Bu esa albatta, besamar ketmaydi. Surxondaryo viloyat “Barkamol avlod” bolalar maktabida “Yangi imkoniyatlar” oyligi doirasida o‘quvchilarning iste’dodi va ijodiy qobiliyatlarini namoyon qilish maqsadida bo‘lib o‘tgan “Jahon milliy raqslari” ko‘rik-tanlovining viloyat bosqichi ishtirok etgan yoshlar esa fikrlarimizning yaqqol isboti bo‘ldilar.
Talov qiziqarli o‘tdi. Ishtirokchilar o‘z raqslariga hamohang tarzda kiyinib, sahnada ko‘rinish berdilar. Turli millatlarning raqslarini o‘ziga xos tarzda ijro etdilarki, bu tomoshabinlar va hakamlar hay’atining e’tiboridan chetda qolmadi. Yillar davomida o‘rganilgan raqs san’atining nozik jozibasini namoyon etgan yosh raqqosalar o’z harakatlari misolida buni ko‘rsata oldilar.
Hakamlar hay’ati xulosasiga ko‘ra Qumqo‘rg‘on tumanining “Charos” raqs dastasi uchinchi, Sherobodning “Qizg‘aldoq” va Sho‘rchi tumanining “Shodlik” raqs dastalari ikkinchi o‘ringa munosib ko‘rildi. Birinchi o‘rin bilan tanlovning respublika bosqichiga yo‘llanmani esa Denov tumanining Surxon zebolari raqs dastasi qo‘lga kiritdi. G‘oliblar viloyat “Barkamol avlod” bolalar maktabi tomonidan faxriy yorliq hamda esdalik sovg‘alar bilan taqdirlandi.
S.Davlatova
