Bugungi kunda malakali va salohiyatli kadrlarga bo‘lgan ehtiyoj hamda talab har doimgidan-da yuqori. Ammo, xodimlarni ishga qabul qilishda ma’lum me’yor va talablarning qo‘yilmasligi bu borada sustkashlikka yo‘l qo‘yishga sabab bo‘layotir. Termiz shahridagi “Tinchlik” mahallasi hududida loyiha qiymati 21 milliard so‘m bo‘lgan, Bilim va malakalarni baholash agentligining Surxondaryo viloyati filiali uchun yangi bino qurilayotgani bu borada yangi qadamni boshlab bersa, ajab emas. Aytish kerakki, ushbu bino ming o‘rinli bo‘lib, barcha zamonaviy texnologiyalar bilan jihozlanadi.
Ayni damda mazkur loyiha doirasida olib borilayotgan qurilish-ta’mirlash ishlari qanday kechayotgani bilan Surxondaryo viloyati hokimi Ulug‘bek Qosimov qiziqib, amalga oshirilayotgan ishlar bilan tanishdi. Loyiha pudratchisi bo‘lmish “Termiz Boysun qurilish” MChJ quruvchilariga ishlarni sifatli amalga oshirish, soha mas’ullariga qurilish ishlarini doimiy nazorat qilib borish topshirig‘ini berdi.
H.Baxtiyorova
