Istaymizmi yo‘qmi, arxiv hujjatlariga ehtiyoj sezamiz. Ayniqsa, nafaqaga chiquvchilar, biror sud yoki boshqa sohalarga oid hujjatlar kerak bo‘lib qolsa, o‘zimiz yashaydigan hududdagi arxiv bo‘limlari jonimizga ora kiradi.
Albatta, bugungi kunda har bir sohaga e’tibor qaratilayotgani kabi arxiv sohasida ham e’tiborga molik ishlar bajarilmoqda. Arxiv binolari uchun yangi binolarning qurib foydalanishga topshirilishi, arxiv hujjatlarining elektronlashuvi, albatta, aholi uchun katta qulaylik yaratadi. Denov tumanida yangi arxiv binosining foydalanishga topshirilishi ham ana shunday qulaylikning amaldagi ifodasidir.
Denov tuman davlat arxivi eski binosi 1956-yilda qurilgan va anchayin eski va ta’mirtalab edi. Yangi ma’muriy binosi 3 qavatdan iborat bo‘lib, 1-qavatida fuqarolarga xizmat ko‘rsatish xonasi, arxivchilar xonasi, bosh arxivchi va fond saqlovchi xonasi, direktor xonasi va boshqa xonalar joylashgan. Binoning 2-3-qavatlarida arxiv saqlov xonalari joylashgan. Binoda hujjatlarni jamlash, hisobini olib borish, saqlash va foydalanishni tashkil etish uchun barcha sharoitlar yaratilgan.
H.Kamolova
