1-SINFGA QABUL BOSHLANDI

Farzandi yetti yoshga to‘lgan ota-ona borki, hayajonda. Maktab ostonasiga ilk bor qadam qo‘yayotgan o‘g‘il-qizlarining kelajagiga katta umid bog‘lab, qo‘llaridan tutgancha maktabga olib borishlari, albatta, ko‘ngilga hayajon uyg‘otadi. 2023-2024-o‘quv yili uchun qabul bugundan, ya’ni 20-iyundan boshlandi. Aytish kerakki, o‘rnatilgan tartibga ko‘ra, 1-sinfga qabul jarayonlari 2 bosqichda amalga oshiriladi.
Birinchi bosqich mikro-hudud doirasida 20-iyundan 31-iyulga qadar davom etsa, ikkinchi bosqich mikro-hududdan tashqarida 1-15-avgust kunlariga qadam amalga oshiriladi. Respublikamizdagi 43 ta tuman (shahar)da 1-sinfga qabul jarayonlari elektron shaklda davlat xizmatlari orqali amalga oshiriladi. Bunda, ota-onalar 20-iyun soat 12:00dan boshlab my.maktab.uz elektron platformasi orqali ro‘yxatdan o‘tib, ariza topshirishlari mumkin.
Qolgan tumanlarda esa an’anaviy shaklda, ya’ni bevosita maktab tomonidan qabul qilinib, 1-sinfga qabul qilingan o‘quvchilar vazirlik elektron tizimi (adm.maktab.uz)ga kiritiladi va nazorat etib boriladi.
Yana bir muhim eslatma shuki, “Ta’lim to‘g‘risida”gi Qonunning (9-moddasi)ga asosan bolalar, ular 7️ yoshga to‘ladigan yilda maktabga qabul qilinadi. Ya’ni bu yil 1-sinflarga 2016-yilning 1-yanvaridan 31-dekabriga qadar tug‘ilgan bolalar qabul qilinadi.