Ertangi kun egalarining munosib ta’lim-tarbiya olishi davlat siyosati darajasiga ko‘tarilgan. Shu sababdan ham maktabgacha yoshdagi bolalarning bog‘chaga qamrovini oshirish ishlari jadallik bilan davom etayotir. Xususan, Muzrabot tumani misolida oladigan bo‘lsak, hozirgi kunda tumanda 23 ta davlat, 1 ta nodavlat, 8 ta davlat-xususiy sherikchilik asosidagi nodavlat va 112 ta oilaviy nodavlat maktabgacha taʼlim tashkilotlari faoliyat yuritib kelmoqda.
Mazkur bog‘chalarda tumandagi 3-7 yoshdagi 13,7 ming nafar bolaning 8,1 nafari yoki 59,3 foizi maktabgacha taʼlimga qamrab olingan. Demak, tumanda tizim bo‘yicha amalga oshirilishi lozim bo‘lgan ishlar talaygina. Aks holda tumandagi 3-7 yoshdagi 40 foiz bola bog‘cha ko‘rmasligi muqarrar.
Ayni jihatlar hisobga olingan holda tumanning “Madaniyat” mahallasida “Rayhongul” MChJ tomonidan loyiha qiymati 1,8 milliard so‘mlik davlat-xususiy sherikichilik asosidagi 100 o‘rinli maktabgacha taʼlim tashkiloti qurilib, foydalanishga topshirildi. Bog‘chaning tantanali ochilish marosimiga viloyat hokimi Ulug‘bek Qosimov, tuman mutasaddilari, nuroniylar, faollar va yoshlar hamda soha masʼullari ishtirok etdi.
Marosimdan so‘ng, mehmonlar xususiy maktabgacha taʼlim tashkiloti bilan yaqindan tanishdilar. Yorug‘ va shinam xonalarni, oshxona, sport maydonchalari va mashg‘ulotlar xonalarini bir-bir ko‘zdan kechirib, yaratilgan qulaylik va shart-sharoitdan quvondilar.
S.Davlatova
