Rivojlangan davlatlarning ta’lim tizimiga, rivoj topayotgan sohalariga nazar tashlasangiz, muvaffaqiyat siri nimada ekanini anglaganday bo‘lasiz. Demak, tajriba o‘rganish, malaka oshirish foyda bo‘lsa borki, aslo zarar emas. Natijada esa bizning ayni tizimlarda ham oldinga siljish, o‘sish kuzatiladi.
Gap kelajak avlod taqdiri haqida ketar ekan, to‘xtash yoki ikkilanish yarashmaydi. Vaqtdan unumli foydalangan holda har qanday tajriba o‘rganilib, amaliyotga tadbiq etilishi shart va zarur. Buni maktabgacha ta’lim tizimi sohasi bo‘yicha oladigan bo‘lsak, nega endi bizning farzandlarimiz ham bizni lol qoldirmasligi, yangi bilimlarni katta qiziqish va tirishqoqlik bilan o‘zlashtirmasligi kerak? Yurtimizda ham xalqaro hamkorlik aloqalari yo‘lga qo‘yilgan bo‘lib, Amerikaning Mercy Corps tashkiloti maktabgacha ta’lim tizimida faoliyat olib borayotgan tarbiyachilarning tajribasini oshirishda o‘ziga xos maktab vazifasini o‘tayotir.
Birinchi qadam sifatida mahorat darslari va seminar-treninglar Jarqo‘rg‘ondan boshlandi. Aytish kerakki, Jarqo‘rg‘on tumanida 15 ta maktabgacha ta’lim tashkilotlari faoliyat yuritadi. Seminarda ushbu maktabgacha ta’lim tashkilotlarining tarbiyachi-pedagoglari jalb etildi va seminar davomida malakali mutaxassislar tomonidan yangicha metodlar tushuntirildi. Ushbu metodlarning foydali jihatlari haqida to‘xtalib o‘tildi. Malaka oshirish jarayonlari qiziqarli va foydali o‘tdiki, seminarda ishtirok etgan tarbiyachilar olgan bilimlarini amaliyotga tadbiq etishga kirishib ketdilar. Aytish kerakki, ana shunday metodlarni qo‘llash bolalarning qiziqishini oshirib, mashg‘ulotlarning yanada qiziqarli bo‘lishiga xizmat qilayotir.
Hilola
