Angor tumanida tashkil etilgan Hunarmandchilik markazi haqida ko‘p va ho‘p gapirdik. Aytish kerakki, ushbu markaz tarkibida tikuvchilik sexi faoliyati ham yo‘lga qo‘yilgan. Bugungi kunda ushbu tikuv sexida 500 nafar xotin-qizning bandligi taʼminlangan bo‘lib, ularning hr biri uchun tikuv mashinasi mavjud. Tikuv sexi oz emas, ko‘p emas, 40 ta xonani band etgan bo‘lib, tikuvchi-chevarlarning qo‘li-qo‘liga tegmaydi. Ish jarayoni qizg‘in tus olgan. Erta tongdan kun botgunga qadar mehnat qilayotgan tikuvchilar o‘zlariga belgilangan buyurtmani tez va sifatli bajarib topshirishga kirishishgan.
Eʼtiborli jihati, ish boshlaganiga hali ko‘p bo‘lmagan mazkur tikuvchilik sexida Qozog‘istondan buyurtma tushgan. Ushbu buyurtmaga asosan maktab o‘quvchilari uchun 60 ming dona maktab formalarini tikish ishlari olib borilmoqda. Undan so‘ng esa Jarqo‘rg‘on tumanidagi sement zavodining ishchi-xodimlari uchun 2000 dona ish formasini tikishga o‘tiladi. Qolaversa, Rossiya davlatidan ham buyurtmalar olingani tikuv sexining faoliyati qoniqarli ekanidan darak beradi.
Ish haqidan esa tikuvchi-chevarlar mamnun. Ular bir kunda 100-150 ming, bir oyda esa 3-3,5 million so‘m oylik-maosh olayotir. Ishning sifati hamda soniga e’tibor qaratilsa, oylik maoshning miqdori aynan shunga bog‘liq ekani, xodimlar shijoatini oshirib, yanada g‘ayrat bilan ishlashga undayapti.
H.Baxtiyorova
