Yoshlikda olingan bilim toshga o‘yilgan naqshdek. Shunday ekan, har bir yosh bu davridan unumli foydalanib, o‘qib o‘rganishi, qiziqish va layoqatidan kelib chiqib, hayotida hal qilivchi qadamni tashlash uchun harakat qilmog‘i lozim. Ana shundagina bilimlar hayot yo‘limizni yorita oladi.
Tanlov va tadbirlar, fan olimpiadalari esa egallangan bilimlarni sinovdan o‘tkazib, munosib bahoni olishga yordam beradi. Asosiy olimpiadaning III (viloyat) bosqichida Angor va Sho‘rchi tumanlaridagi alohida ta’lim ehtiyojlari bo‘lgan ko‘zi ojiz va zaif ko‘ruvchi bolalar ham ana shunday sinovda sinashta bo‘ldilar.
Olimpiada matematika, ona tili va adabiyoti hamda tarix fanlaridan bo‘lib o‘tdi. Turgan gapki, olimpiada so‘nggida bilimli, salohiyatli yoshlar saralandi.
Termiz shahridagi “Barkamol avlod” bolalar markazi faollar zalida ixtisoslashtirilgan “Nurli maskan” maktab-internati o‘quvchilarining taqdirlash marosimi bo‘lib o‘tdi.
G‘oliblar vazir jamg‘armasi hisobidan pul yutuqlari hamda faxriy yorliqlar bilan taqdirlandi. Aytish kerakki, Asosiy olimpiadaning ushbu bosqichida mazkur ta’lim muassasalaridan 48 nafar o‘quvchi ishtirok etib, ularning 27 nafari olimpiadaning Respublika bosqichiga yo‘llanmani qo‘lga kiritdi.
S.Murodova
