Bugun ta’lim tizimiga har qachongidan-da katta e’tibor qaratilgan. Sal avval maktabni bitirgan o‘quvchi o‘rta-maxsus yoki oliy ma’lumotni olish uchun o‘qishni davom ettirishga majbur bo‘lgan bo‘lsa, ayni paytda dars jarayonlari bilan birga chet tillari hamda o‘quvchining qiziqishiga qarab biror kasb-hunar o‘rgatilishi kelgusi hayotlarida o‘z ishini boshlashi, mustaqil qadamni tashlashi uchun muhim ahamiyat kasb etayotir. Buning uchun ta’lim muassasasida yetarli shart-sharoit va malakali mutaxassislar, hunarmand-ustalar jalb etilsa bo‘lgani.
Surxondaryo viloyat hokimi Oltinsoy tumanida bo‘lib, umumtaʼlim maktablarida bo‘lib, bu borada amalga oshirilayotgan ishlar bilan tanishdi. Jumladan, Oltinsoy tumani 2-sonli kasb-hunar maktabida o‘quvchilarga kasb o‘rgatish borasida olib borilayotgan ishlar, amaliy mashg‘ulot xonalarining jihozlanganlik holati o‘rganildi. O‘quvchilar bilan taʼlim sifati va kasb-hunar o‘rganish darajasi haqida suhbat o‘tkazildi.
Shuningdek, tumandagi 18-, 19- va 27-sonli maktablarda ham taʼlim sifati bilan birga chet tillari va kasb o‘rgatishni yo‘lga qo‘yish lozimligi ta’kidlandi. Buning uchun o‘quvchi-yoshlar hududdagi kasb-hunar maktablaridagi mavjud bazadan foydalanishadi.
S.Davlatova
