Ishtirokka munosib rag‘bat

Sportga qaratilgan e’tibor, albatta, yoshlarni u yoki bu sport turiga qiziqishiga, bo‘sh vaqtini mazmunli o‘tkazishga xizmat qilayotir. Qay sport turi haqida gap ketmasin, voha yoshlarining yutuq va muvaffaqiyatlari maqtanishga arzigulik.
Ayni shunday gimnastikada ham e’tibor, qiziqish kam emas. Bolajonlarning 3 yoshidan gimnastikaga kirib kelishi muvaffaqiyatli o‘rganishning garovi bo‘lib xizmat qilyapti. Termiz shahridagi 17-sonli umumta’lim maktabining 3-sinf o‘quvchisi Asila Ro‘ziboyeva ham bolalikdan gimnastikaga mehr qo‘ygan yoshlardan. Har bir harakatni gimnastika murabbiyidan mohirlik ila o‘rganib takrorlaydigan qizaloq turli tanlov va musobaqalarda, bayram tadbirlarida anchayin faol.
Asilaning nozik harakatlari, nafis raqslari esa uni kuzatayotganlarning e’tiborini tortmay, mehrini qozonmay qo‘ymaydi. Shuning uchun ham u qayd etgan natijalar e’tiborga molik. Yosh gimnastikachi qizaloq Tojikistonda bo‘lib o‘tgan Osiyo chempionatida ishtirok etdi. O‘zi kabi raqibalari ham mohir gimnastikachilar. Ana shunday murosasiz bellashuvda Asilaxonning ishtiroki faxrli 1-o‘rinni munosib ko‘rildi va 25 million so‘m pul mukofotini qo‘lga kiritdi.
S.Davlatova