Farrux Norchayev nomini ko‘pchilik yaxshi tanimas, ammo Sho‘rchi tumanining “Ko‘klam” mahallasi ahli yaxshi biladi. Shu mahallada ulg‘ayib, sportga mehr qo‘ygan. Yoshligidan karate sport turi bilan shug‘ullanib, chiniqqan o‘g‘lonning nomini endi nafaqat respublikamiz, balki dunyo ahli ham yaxshi taniydigan bo‘ladi.
Sababi Farrux Tailandning Pattayya shahrida muay-tay bo‘yicha o‘smirlar, yoshlar va kattalar o‘rtasida bo‘lib o‘tgan XVII jahon chempionatida ishtirok etdi. Aytish kerakki, sayyoramizning 50 ga yaqin davlatidan borgan sportchi yoshlar ishtirok etayotgan dunyo birinchiligida O‘zbekiston delegatsiyasi eng ko‘p sportchi bilan ishtirok etmoqda.
E’tiborlisi, +71 kg vazn toifasida yoshlar o‘rtasidagi bahslarda ishtirok etayotgan Farrux Norchayev finalga yo‘l oldi. Sho‘rchilik yosh sportchi yarim final bosqichida fransiyalik Ayub Bauazzani mag‘lubiyatga uchratib, musobaqa davomida italiyalik raqibi ustidan ham g‘alaba qozonib, jahon chempioni bo‘ldi.
H.Baxtiyorova
