Oliy ta’lim muassasalari talaba-yoshlarni nafaqat u yoki bu mutaxassislik bo‘yicha tayyorlaydi, balki ularning bo‘sh vaqtini mazmunli tashkil etishda ham mas’ul. Yoshlarning iqtidorini yuzaga chiqarish uchun turli tadbirlar, uchrashuv va kechalar, ko‘rik-tanlov va musobaqalar o‘tkazib kelinadi. Termiz davlat universitetida ham talabalarning boʻsh vaqtini mazmunli tashkil etish hamda ularni ragʻbatlantirish maqsadida Oʻzbekiston Respublikasi davlat mustaqilligining 31 yilligiga bagʻishlab “Yangi Oʻzbekistonda el aziz, inson aziz!” mavzusida onlayn insho, rasm, she’r va qo‘shiqlar (o‘z muallifligidagi audio formatda) tanlovi e’lon qilindi.
Ushbu tanlov adabiyotga, san’atga qiziquvchi iste’dod sohiblarining o‘z iqtidorlarini namoyish etishlari uchun bir imkon vazifasini o‘tadi. Vatan tasviri tushirilgan ajoyib chizgilar, misralarga jo bo‘lgan tuyg‘ular hakamlar hay’atini befarq qoldirmadi. Ayniqsa, sohir ovoz sohib va sohibalari ijrosidagi mualliflik qo‘shiqlari ham ajoyib. Har bir yo‘nalishda o‘z ishining ustalari, eng yaxshi ijodiy ishlar saralandi. Mas’ul ishchi guruhning yakuniy xulosasiga koʻra g‘olib deb topilgan talabalarning taqdirlash marosimida e’tiborga tushgan she’r-u qo‘shiqlar, insho va rasmlar e’tirof etildi.
Tanlov g‘oliblari Termiz davlat universiteti tomonidan diplom va har bir yo‘nalish bo‘yicha pul mukofotlari bilan taqdirlanishdi.
Hilol
