Qishloq ahli asosan dehqonchilik va chorvachilik orqasidan kun ko‘radi. Ro‘zg‘orini butlab, qozonini qaynatadi. Ortiqchasidan daromad ko‘radi, kam-ko‘stini to‘ldiradi. To‘rt muchasi sog‘ odam ishlayman deya, kuch-quvvati bo‘lsa-yu, sharoit bo‘lmasa, bundan yomoni yo‘q. Muzrabot tumanidagi “Xalq yo‘li” mahallasida suv tanqisligi sabab mahalla ahli ekin-tikin qila olmaydi. Bilganingizdek, oqar suvga bo‘lgan talab yuqori.
Tayinlangan hokim yordamchisi esa bu muammoga munosib yechim topish ustida bosh qotirib, axiyri ilojini topdi. Hokim yordamchisi Shuhrat Ravshanov tashabbusi bilan subsidiya asosida mahallaning “Muzrabot” ko‘chasida Dilshod Jo‘rayev tomonidan artizan qudug‘i qazish ishlari olib borilmoqda. Reja amalga oshib, qazish ishlari tugallansa, yaqin kunlarda 30 ta xonadon oqar suv bilan ta’minlanlanadi.
S.Murodova
