Dunyoda eng birinchi surat 8 soat davomida olingan. Ha, suratga olish vaqt, tayyorgarlik talab etgan. Texnikaning kuchini qarangki, bugun bir soniyada qanchadan-qancha suratlar olib, lahzalarni manguga muhrlash mumkin. Faqatgina teran nigoh ila boshqalar e’tibor bermagan va ko‘ra olmagan jihatlarni ko‘ra olgangina mohirlar ichra mohir bo‘lishi mumkin.
Suratga olishning ham o‘z qiyinchiliklari bor. Iqtidor, mehnat, tajriba va nazariy bilimlar uyg‘unligida ko‘p narsalarga erishish mumkin. Boysun tumani hokimligi axborot xizmati hamda Barkamol avlod bolalar maktabi hamkorligida “Yosh fotohavaskor” to‘garagi a’zolari ishtirokida tashkil etilgan mahorat darsida tasvirga olish hamda sifatli foto lavhalarni tayyorlash mavzusida qimmatli ma’lumotlar berildi.
Y.Xoliyorov, J.Xo‘janazarovlarning darsi to‘garak a’zolarining bilishi lozim bo‘lgan jihatlarni bilishiga, anglashiga turtki bo‘ldi. Har qanday bilim amaliyot bilan uyg‘unlashsa, yaxshi natija berishi isbotlanganidek, nazariy saboqlar amaliy jarayonlarga ulandi. Ko‘ngilli yosh fotograflar joylarga chiqib, suratga oldilar.
Fotoapparatlar, fotosuratlarning kelib chiqish tarixi, suratga olish jarayoni haqidagi ma’lumotlar, albatta, barcha uchun qiziqarli bo‘lishi aniq. Shu sababdan ham ayni ma’lumotlarni to‘garak a’zolari maroq bilan tingladi.
Mana shunday to‘garaklarning va mahorat darslarining tizimli tashkil etilgani o‘quvchi-yoshlarning vaqtini, qolaversa, ta’tilni maroqli o‘tkazishida, foydali ish bilan mashg‘ul bo‘lishiga sharoit yaratadi.
S.Murodova
