O‘zbekiston Respublikasi davlat tili — o‘zbek tilidir. Amaldagi yozuv lotin yozuviga asoslanganiga qaramay, qayerga boqmaylik rus yo ingliz tilidan olingan qurama so‘zlar bilan yozilgan e’lon-u nomlarga ko‘zimiz tushadi. “Muslimbook”, “M-style”, “Durum”, “Imperia” yana baloyi battarlar…
Ba’zida odam qay biri o‘zbek tilida-yu, qay biri o‘zlashganini ham bilolmay qoladi. Muqobil varianti bo‘lmasa ham mayli edi, ammo “apteka” so‘zining o‘rnida erkin “dorixona” deb ishlatishimiz, shuningdek, jamoat joylarga o‘zbekcha betakror, serma’no nomlar ham qo‘yish mumkin-ku. Bu ishlarning oldi olinmay, shu holatda davom etaversa, o‘zbek tilining nufuzi tushib ketish xavfi ortadi, nazarimda.
Ushbu holatdan qayg‘urgan mutasaddilar O‘zbekiston Respublikasi Bosh vazirining 2022-yil 18-maydagi topshiriq xati ijrosi bo‘yicha Bandixon tumanida o‘z ishlarini boshlashdi. Bu hududdagi tadbirkorlik subyektlari tomonidan ilingan tashqi yozuvlar va peshlavhalar davlat tilida bo‘lishi ta’minlanmoqda.
Oʻzbekiston Respublikasi Prezidentining 2019-yil 11-sentabrdagi 5817-sonli Farmonining ijrosini taʼminlash maqsadida tumandagi Obod yurt ko‘chasida joylashgan bir qancha tadbirkorlik subyektlariga tushuntirish va targ‘ibot ishlari olib borildi. Ogohlantirish xatlari berildi. Umid qilamizki, sa’y-harakatlardan so‘ng tadbirkorlar tilimizning butun jozibasidan foydalanish yo‘li sari qadam qo‘yishadi.
Dildor Otaqulova
