Ta’til foydali yumushlar va mashg‘ulotlar bilan o‘tsa, yanada yaxshi. Surxonadryo viloyat Bolalar kutubxonasi va Respublika Ma’naviyat va ma’rifat markazi Termiz shahar bo‘limi ta’tilda yoshlarning vaqtini mazmunli o‘tkazish maqsadida ezgu tashabbuslarni boshlab yuborishdi.
Kitob mutolaasi zarurat. Kitobxonlik madaniyatini rivojlantirish esa kelajakka qo‘yilgan shahdam qadam kabidir. Termiz shahridagi “Amudaryo bolalar sog‘lomlashtirish” oromgohida tashkil etilgan “Kitob oqshomi” festivalidan ko‘zlangan maqsad o‘zini oqladi.
Festivalda kitobxonlar jam bo‘ldi. Taassurotlar va bilimlar birlashdi. Kitobxon tengdoshlarining zukkoligi, bilimdonligi va dunyoqarashi keng ekanini kuzatayotganlar ham qo‘llariga kitob tutib, mutolaani ko‘ngliga tugishdi.
Ajoyib bayram dasturi, ijro etilgan kuy-qo‘shiqlar hamda sahna ko‘rinishlari barchaga manzur bo‘ldi.
Festival doirasida turli sovrinli o‘yinlarda faol ishtirok etib, g‘olib bo‘lgan o‘g‘il-qizlar faxriy yorliq va kitoblar jamlanmasi bilan taqdirlandi.
S.Baxtiyorova
