Oliygohni tamomlash arafasida turgan yosh borki, hayotidagi muhim qadam — munosib ish topish haqida o‘ylab qoladi. Qaysidir tashkilot eshigini qoqib, ko‘ngildagidek ishni topgunicha anchagina ter to‘kishiga to‘g‘ri keladi. Talaba-yoshlarni, ayniqsa, bitiruvchilarni ish bilan ta’minlash maqsadida Termiz davlat universitetida “Karyera markazi” tashkil etildi. Markazda ayni vaqtda mavjud boʻlgan va mehnat bozori talab qilayotgan boʻsh ish oʻrinlari haqida maʼlumotlar berib boriladi.
Markazning ochilish marosimi talaba-yoshlar uchun haqiqiy xursandchilik bo‘ldi. Universitet rahbariyati, professor-oʻqituvchilar, Oʻzbekiston Respublikasi Prezidenti huzuridagi Davlat xizmatini rivojlantirish agentligi viloyat filiali, viloyat Bandlik bosh boshqarmasi, viloyat Yoshlar ishlari agentligi vakillari, talabalar va ommaviy axborot vositalari vakillari ishtirok etgan marosimda markazning maqsadi, yoshlarning bandligini ta’minlash va ish beruvchilar bilan o‘zaro aloqalarni rivojlantirish masalalari yuzasidan ma’lumotlar berildi.
Markaz doimiy ravishda universitetda boʻsh ish oʻrinlari yarmarkalari tashkil etadi. Oʻquv seminarlari oʻtkazib, talabalarni kasbiy sinovdan o‘tkazadi. Qiziqish hamda mutaxassisliklaridan kelib chiqib kasbga yoʻnaltiradi. Qolaversa, ish beruvchilar bilan hamkorlik o‘rnatishda ko‘prik vazifasini o‘taydi. “Karyera markazi”da ish izlovchilar hamda ish beruvchilar toʻgʻrisidagi maʼlumotlar bazasi ham shakllantirilib, ochiq vakansiyalar roʻyxati haqida ma’lumotlar berib boriladi.
Eng asosiysi Markaz boʻsh ish oʻrinlari uchun talabalardan talab etilayotgan bilim, koʻnikma va malakalar bilan ularni xabardor qilib boradi. Bunday xizmat turlarining yo‘lga qo‘yilgani talabalarning kelgusida kasb tanlashlarida muhim ro‘l o‘ynaydi.
S.Normurodova
