Iqtidorlarni kashf etish, to‘g‘ri yo‘naltirib, ularni munosib rag‘batlantirish, qolaversa, yoshlar vaqtini mazmunli tashkil etish maqsadida doimiy tarzda tanlovlar, tadbir-u kechalar uyushtirib kelinadi. Albatta, bu o‘z navbatida yoshlarga motivatsiya beradi. O‘z oldiga to‘g‘ri maqsad qo‘yishni, imkoniyatlaridan to‘g‘ri foydalanishni o‘rganadi.
Respublika miqyosida “Besh tashabbus olimpiadasi” doirasida turli sport musobaqalari, bilimlar bellashuvi va iqtidorli yoshlar saralangan bo‘lsa, har bir bosqichdan o‘tish, g‘oliblik nashidasi ularga munosib baho bo‘ldi deyish mumkin. Ayniqsa, tanlov g‘oliblari va faol yoshlar Toshkent viloyatidagi “Bo‘stonliq” dam olish oromgohiga borish imkoniyatiga ega bo‘lgani ular uchun kutilmagan tuhfa bo‘ldi.
Vohamizning bir guruh yigit-qizlari Bo‘stonliqqa yetib bordilar va ko‘ngildagidek xordiq chiqarishayotir. Ajoyib taassurotlar, uchrashuv va suhbatlar ular qalbida bir umrga muhrlanib qolishiga shubha yo‘q.
S.Murodova
