Avtohalokatlar sabab qanchadan-qancha jarohatlanganlar, bir umr kemtik jonga aylanganlar-u qurbonlar bor. Raqamlar statistikasi o‘ylashga, tezlikni oshirmaslikka, qoidalarga rioya qilishga undasa, qaniydi. Afsus…
Mashina ruliga o‘tirayotgan haydovchi bu haqida ko‘p ham o‘ylamas, ammo davlat o‘ylaydi. Shirin jonlarni qonun va qarorlar bilan o‘ylashga da’vat etadi, kerak bo‘lsa, majburlaydi ham. “Avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish chora-tadbirlari to‘g‘risida”gi Prezident qarorining qabul qilinishi ana shunday ezgu maqsadga xizmat qiladi deyish mumkin. Amaliyotga joriy etilayotgani kishini xushyorlikka va namunali haydovchi bo‘lishga chorlaydi.
Joriy yil 1-dekabrdan haydovchilarga yo‘l harakati qoidabuzarligi uchun jarima ballarini hisoblash tizimi joriy etiladi. Har bir qoidabuzarlik uchun 12 oy davomida alohida jarima ballari hisoblab boriladi va ballar belgilangan miqdordan oshganda haydovchi ma’lum muddatga transport vositasini boshqarish huquqidan o‘rnatilgan tartibda mahrum qilinadi.
Qarorning quvontiradigan tomoni shuki, haydovchi muayyan davr mobaynida qoidabuzarlik sodir etmasa, keyinchalik unga hisoblangan jarima ballarini qisqartirish orqali rag‘batlantirish choralari qo‘llaniladi.
S.Normurodova
