Har birimizning o‘ziga yarasha talab va ehtiyojlarimiz mavjud. Kundalik turmushda, ayniqsa, oziq-ovqatga bo‘lgan ehtiyoj birlamchi. Ro‘zg‘orda bir kun qora qozon qaynamasa, keyin ko‘raveringda. Ovqatga “unnash” uchun esa, avvalo, yog‘ zarur. O‘z ehtiyojing uchun zarur oziq-ovqat mahsulotlarini ta’minlay olishing ham katta gap.
Ayni shu maqsadda, aholini mahalliy sharoitda ishlab chiqarilgan o‘simlik yog‘i bilan ta’minlash, import hajmini keskin qisqartirish maqsadida kungaboqar, soya, masxar, raps, kunjut va zig‘ir ekiladigan maydonlar hajmini oshirish bilan birga, hududlarning tuproq-iqlim sharoitidan kelib chiqib, Sariosiyo tumanida 50 gektar yer maydonida zaytun plantatsiyasi tashkil etilmoqda. Mazkur plantatsiya bilan yaqindan tanishish maqsadida Ispaniyaning “Gedespa” kompaniyasi Prezidenti Alexandro Pastrana tashrif buyurdi.
Ushbu hududlarda 10 gradusgacha bo‘lgan sovuqqa chidamli Arbusano (Italiya), Arbikino (Italiya), Manzaniya va Kolores (Ispaniya) hamda Gemlik (Turkiya) navli zaytun ko‘chatlari ekilishi ko‘zda tutilgan bo‘lib, Alexandro Pastrana loyiha bilan yaqindan tanishib, ajratilgan yer maydonini ko‘zdan kechirdi.
Shundan so‘ng, chet ellik mehmon tumanda intensiv usulda tashkil etilgan bog‘lar, issiqxonalar bilan tanishdi hamda fermer xo‘jaligi tomonidan parvarish qilinayotgan tuyaqushlarni ham borib ko‘rdi.
Haqgo‘y
